Leni Robredo: LP senatorial slate subok at maaasahan

“ISANG malaking kara-ngalan ang makasama ang labindalawang senatoriables ng partido sa darating na halalan.”

Ito ang deklarasyon ni Liberal Party (LP) vice presidential candidate Leni Robredo kasunod sa pag-anunsiyo sa 12 pambato ng partido bilang senador sa 2016 elections.

Kabilang sa senatorial slate ng LP sina Senate President Franklin Drilon, senador Teofisto “TG” Guingona III at Ralph Recto, dating senador Francis Pangilinan at Panfilo “Ping” Lacson, outgoing Justice Secretary Leila de Lima; outgoing Energy secretary Jericho Petilla, outgoing Technical Education and Skills Development Authority chief Joel Villanueva, Mark Lapid, dating party-list representative Risa Hontiveros at mga baguhang sina Nariman Ambolodto at Cresente Paez.

Ang labindalawang senatorial candidates ay tinaguriang “Koalisyon ng Daang Matuwid.”

“Subok at hindi matatawaran ang kani-kanilang kakayahan sa iba’t ibang aspeto ng serbisyo publiko at sa pagsusulong sa kapakanan ng taumbayan,” wika ni Robredo.

“Marahil, nakatrabaho ni Jesse ang karamihan sa kanila at nagtitiwala tayo na masinsing pinili ng partido ang labindalawa para sa pagpapatuloy at pagsusulong ng daang matuwid,” aniya.

Inaasahang sabay-sabay na maghahain ng certificate of candidacy (COC) ang mga pambato ng LP sa Huwebes.