680 sakong resin pellets hinaydyak ng driver, pahinante

ARESTADO ang isang truck driver at pahinante sa paghaydyak sa 680 sakong resins pellet na sangkap sa paggawa ng plastic materials, makaraang salakayin ng mga awtoridad ang isang maliit na bodega sa bahagi ng Canumay East, Valenzuela City.

Kinilala ang mga naaresto na sina Romar Palabrica, 31, truck driver, at Arnold Arellano, 27, truck helper, kapwa residente ng Sitio Hilltop, Simiong, Batangas City.

Ayon sa inisyal na ulat ng pulisya, may natanggap silang report na isang Fuso 10 wheeler truck na may kargang plastic ingredients, ang hinaydyak ng apat armadong kalalakihan sa Mindanao Avenue, Quezon City.

Ngunit lumitaw sa imbestigasyon ng pulisya na kasabwat ng nasabing driver ang sinasabi niyang apat na hijackers na tumangay sa kanyang minamanehong truck. Ang kargamento ay nabatid na dinala sa isang bodega na pag-aari ng isang Jay Cayanan na mabilis na nakatakas.

Lalong tumibay ang hinala ng pulisya nang aminin ng nasabing pahinante na ang kasama niyang  driver ang may pakana sa paghaydyak.

Nahaharap sa kasong qualified theft ang driver ng truck at ang kanyang pahinante, gayondin ang sinasabing apat na hijackers na hindi pa nakikilala.