2 MTPB timbog sa kotong

ARESTADO ang dalawang tauhan ng Manila Traffic and Parking Bureau (MTPB) sa mga operatiba ng Manila City Hall-Manila Action and Special Assignment (MASA) sa entrapment operation bunsod ng mga reklamo laban sa kanila sa Sta. Cruz, Maynila.

Kinilala ni MASA chief, Chief Insp. Bernabe  Irinco, Jr. ang mga suspek na sina Joselito Garcia, 46, ng Road 4, Benita St., Gagalangin, Tondo, Maynila, at Marvin Cannaoay, 32, residente ng Int. 17, Burgos St., Paco, Maynila.

Sinabi ni Irinco, matagal nang inirereklamo ang ilang mga tauhan ng MTPB sa lugar ngunit hindi nila matiyempohan ang mga suspek.

Dakong 3 p.m. nitong Biyernes nang ikasa ni SPO2 Nicanor Zablan III at PO2 Joel Delos Santos ang entrapment operation makaraang maghain ng reklamo ang isang  Erickson Unday sa panulukan ng Recto at Evangelista Streets, Sta. Cruz, Maynila .

Sa pahayag ni Unday, humihingi sa kanya ng pera ang tatlong MTPB personnel makaraan siyang sitahin dahil sa traffic violation. 

Lumilitaw na una nang nahuli si Unday ng nabanggit na traffic enforcers at nagbigay siya ng P1,500.

Sa pangalawang pagkakataon ay walang pera si Unday kaya minabuti niyang iwan ang kanyang lisensiya kina Garcia at Cannaoay at humingi siya ng tulong sa MASA.

Agad naglaan ng mark money si Irinco at isinagawa ang entrapment operation at mabilis na nadakip sina Garcia at Cannaoay habang nakatakas ang isa pa.

Nakatakdang sampahan ng kasong robbery extortion sa Manila City Prosecutor Office sina Garcia at Cannaoay.