14-anyos dalagita tinurbo sa nitso

CAUAYAN CITY, Isabela – Desididong ipakulong ng pamilya ng 14-anyos dalagita ang isang tricycle driver na gumahasa sa biktima sa Lungsod ng Ilagan kamakalawa.

Ang biktima ay itinago sa pangalang Ana habang ang suspek ay si John Kenneth Umayyam, 26-anyos, may-asawa at residente ng Calamagui 2nd, Ilagan City .

Sa pahayag ng tiyahin ng biktima, sasampahan si Umayyam ng kasong rape in relation to Republic Act 7610 o Anti-Child Abuse Law.

Galing aniya ang kanyang pamangkin sa isang tindahan ngunit napainom nang nakalalasing na inomin kaya nahihilo na nang pumapara ng tricycle.

Nang matapat ang tricycle na minamaneho ni Umayyam ay sumakay ang dalagita at nagpahatid sa kanilang bahay ngunit iniliko ng suspek ang tricycle patungo sa sementeryo.

Bagama’t nanlaban si Ana at kinalmot ang suspek ay nadala siya sa ibabaw ng nitso at doon isinagawa ang panghahalay sa kanya

Ang suspek ay pamilyar sa biktima dahil minsan na niyang nasasakyan ang tricycle ni Umayyam.

Kasama ni Ana ang mga pulis na nagmanman sa lugar kung saan siya isinakay ni Umayyam hanggang makita ang pulang tricycle ng suspek.

Nang lapitan siya ng mga pulis ay nakita ang sariwa pang kalmot sa kamay ni Umayyam.

Ayon pa sa tiyahin ng biktima, ilang beses nang nagtungo sa kanila ang mga kamag-anak ng suspek para makipag-ayos ngunit desidido silang ipakulong si Umayyam.