Aswang gumagala sa Ilocos Norte

LAOAG CITY – Nababalot ng takot ang mga residente sa Brgy. Magnuang, Batac, Ilocos Norte, dahil sa sinasabing gumagalang aswang sa kanilang lugar.

Batay sa impormasyon, mula nang lumabas ang balitang may gumagalang aswang sa nasabing barangay ay natatakot nang lumabas sa gabi ang mga residente at maaga na rin silang nagsasara ng kanilang mga bahay.

Ayon kay Brgy. Chairman Felix Valencia, simula nang napabalitang may gumagalang aswang sa kanilang lugar ay wala pa namang nasaktan o naging biktima sa kanilang barangay. 

Aniya, nagsimula ang naturang balita nang may isang lalaking nagpapataya ng jueteng ang nakakita nang gumagalang dalawang  biik sa dis-oras ng gabi ilang araw na ang nakalilipas.