Mga retiradong heneral sa BoC masisibak?

Tuluyan kayang masisibak sa Bureau of Customs (BoC) ang grupo ng mga retiradong heneral mula sa kapulisan at kasundaluhan na tungkuling pa-tinuin ang takbo at palakasin ang kinikita ng aduwana?

Dahil umano sa kanilang integridad at husay bilang lider ay itinalaga ang 14 na heneral para pamunuan ang ilang mahahalagang puwesto sa Customs, bilang kapalit ng mga regular na empleyado na pinaghihinalaang sangkot sa mga anomalya.

Ganu’n pa man, sa tingin nina Marikina City Representative Miro Quimbo at Valenzuela Representative Magi Gunigundo, chairman at vice chairman ng House Committee on Ways and Means, ay bigo ang mga heneral na tuparin ang kanilang tungkulin at dapat na silang alisin.

Tinukoy ng mga mambabatas na mas mataas ang koleksyon ng Customs noong 2012 kumpara sa naitalang kinita nito noong 2014. Paglabag daw ito sa “Lateral Attrition law” na nagsasaad na sisibakin ang mga opisyal at empleyado kung mabibigo na makuha ang target nilang koleksyon.

Ayon sa isang abogado ay hindi maaaring alisin ang mga heneral dahil itinalaga sila sa puwesto ni Finance Secretary Cesar Purisima, at hindi maituturing na regular na empleyado ng Customs. Dahil dito ay hindi sila nasasakop ng attrition law.

Pero kailangan ba talagang panatilihin ang mga heneral at isangkalan ang katuwirang “co-terminus” ang kanilang trabaho sa nag-appoint sa kanila, habang nagdurusa at humihina pa kaysa rati ang koleksyon na kanilang tinututukan?

Hindi natin pinagdududahan ang kakayahan ng naturang mga heneral pero pag-isipan din natin kung akma ba ang kanilang kahusayan sa responsibilidad na naitoka sa kanilang mga balikat sa Customs?

Alalahanin na kung napanatili ng mga heneral na malinis ang kanilang iniingatang pangalan habang nasa loob ng PNP o AFP, na kapwa may sariling mga isyu ng katiwalian na pinagdara-anan, baka sa Customs pa sila pumalpak at tuluyang masira. Noon pa man ay mainit na paksa na ang BoC dahil sa mga iregularidad na naka-kabit dito, kaya itinuturing itong isa sa pinaka-corrupt na ahensya sa gobyerno.

Kung hindi kayang gampanan ng mga heneral ang sensitibong tungkuling patinuin ang koleksyon ng Customs ay makabubuting palitan sila ng mga tao na may sapat na kakayahan para gawin ang trabahong ito.

***

SHORT BURSTS. Para sa mga komento o reaksiyon, mag-email [email protected] o mag-tweet sa @Side_View.