Bugaw na bebot niratrat sa hagdan ng Int’l Cabaret

PATAY ang isang bugaw ng mga babaeng nagbebenta ng aliw makaraang pagbabarilin ng hindi nakilalang lalaki habang pababa ng hagdan kahapon ng umaga sa Caloocan City.

Binawian ng buhay sa pinangyarihan ng insidente ang biktimang si alyas Ledy, nasa 25-30-anyos, patuloy pang inaalam kung ano ang tunay na pangalan at kung tagasaan, tinamaan ng bala ng hindi nabatid na kalibre ng baril.

Batay sa nakalap na ulat mula sa Station Investigation Division (SID), naganap ang insidente dakong 7 a.m. sa hagdan ng dating International Cabaret sa 3rd Avenue, Grace Park ng  nasabing lungsod.

Galing ang biktima sa itaas nang giray-giray na gusali na ginawang paupahang kuwarto at habang pababa  sa hagdan ay sinalubong siya ng hindi nakilalang suspek at siya ay pinagbabaril.

Pagkaraan ay walang buhay na gumulong pababa ng hagdan ang biktima. Habang mabilis na tumakas ang suspek.

Hinala ng mga awtoridad na may kinalaman sa ilegal na droga ang motibo sa insidente dahil bukod sa pagiging bugaw ay drug addict din ang biktima.