Shakey’s V League: Ateneo, UST sasalang sa do-or-die game

MAGHAHARAP ngayon ang Ateneo de Manila at University of Santo Tomas sa ikatlo at huling laro sa best-of-three semifinals ng Shakey’s V-League 12 Collegiate Conference sa Filoil Flying V Arena sa San Juan.

Magsisimula ang laro sa alas-4 ng hapon kung saan tabla sa tig-isang panalo ang dalawang pamantasan sa serye.

Nanalo ang Lady Eagles, 27-25, 25-16, 25-17, sa Game 1 noong Sabado ngunit nakabawi ang Tigresses, 18-25, 25-16, 25-23, 25-22, sa Game 2 noong Linggo.

Pinutol ng UST ang sampung sunod na panalo ng Ateneo mula pa noong eliminations.

Noong nagkampeon ang Ateneo sa UAAP Season 77 ay walang nalasap na talo ang Lady Eagles.

Inaasahang pangungunahan ni UAAP MVP Alyssa Valdez ang Ateneo habang sina EJ Laure, Carmela Tunay at Pam Lastimosa naman ang babandera sa UST.

“Hindi naman kami invincible,” wika ni Valdez pagkatapos ng Game 2. “It’s really a wakeup call and a learning experience for the team. We are really hoping for the best on Wednesday, all out na but win or lose it’s the learning that we can get here is important. They (UST) really worked hard as a team, sa lahat ng aspect nag-work talaga sila, sobrang fluid nila. Sa amin naman may times na off kami hindi namin kontrolado ‘yun.”

Ang mananalo ngayon ay haharap sa National University sa best-of-three finals na magsisimula sa Linggo, Setyembre 20 at ang matatalo naman ay lalaban sa Far Eastern University para sa best-of-three na serye para sa ikatlong puwesto simula sa Sabado, Setyembre 19.

Naunang winalis ng Lady Bulldogs ang Lady Tamaraws sa kanilang hiwalay na serye sa semis.

Mapapanood ang mga laro ng Shakey’s V League sa GMA News TV Channel 11. (James Ty III)