DSWD lalong nadiin sa COA (Donasyon sa ‘Yolanda’ ‘di naipamahagi)

LALONG nadiin ang Department of Social Welfare and Development (DSWD) sa naging ulat ng Commission on Audit (COA).

Lumalabas sa audit ng COA, totoo ngang nabigo ang nasabing ahensiya na maipamahagi agad ang natanggap nitong cash donations at family food packs sa mga biktima ng supertyphoon Yolanda.

Base sa datos, nasa P382 milyong local at foreign cash donations para sa mga biktima ng bagyo o 33% ng P1.15B na natanggap ng DSWD, ang nananatili sa bank accounts nito.

Sa ulat pa ng ahensiya, nabigo rin ang DSWD na maipamahagi ang P141milyong halaga ng family food packs kaya nasayang dahil nabulok  lamang.

Ayon kay Kabataan Partylist Rep. Terry Ridon, ilang beses nang kinondena ang DSWD dahil sa mismanagement at mabagal na distribusyon ng tulong sa mga biktima ng nasabing bagyo.

Bira ng mambabatas, dapat managot ang lahat ng responsable sa naturang kapalpakan ng DSWD lalo na ang administrasyong Aquino at iba pang ahensiya  na nangangasiwa sa distribusyon ng tulong.