Perlas Pilipinas umuwi na mula sa Wuhan

DUMATING na sa bansa kahapon ang Perlas Pilipinas mula sa Wuhan, Tsina, kung saan gumawa ito ng kasaysayan noong isang linggo nang pumasok ito sa Level 1 ng  2015 FIBA Asia Women’s Championship.

Sa pangunguna nina coach Patrick Aquino at team manager Wilbert Loa, nilampaso ng Perlas ang North Korea, 68-67, Sri Lanka, 65-45, Hong Kong, 75-62, Kazakhstan, 80-73 sa overtime at India, 82-76.

Isang talo lang ang nalasap ng Perlas at ito’y kontra Malaysia, 71-64.

Naging pinuno ng delegasyon si  Samahang Basketbol ng Pilipinas deputy executive director Bernie Atienza.

Bukod sa Pilipinas, aabante sa Level 1 ng FIBA Asia Women’s Championship sa 2017 ang North Korea, Tsina, South Korea, Japan at Chinese-Taipei.

Ilan sa mga manlalaro ni Aquino sa Perlas ay sina Ewon Arayi, Afril Bernardino, Allana Lim at Shelly Gupilan. (James Ty III)