Anak ng retired general namaril 1 patay, 2 sugatan

MULING nasangkot sa krimen ang anak ni dating Philippine Constabulary Gen. Antonio Abaya na ikinamatay ng isang babae at dalawa ang sugatan makaraang pagbabarilin ang isang van kamakalawa ng gabi sa Quezon City.

Sa ulat ni Chief Insp. Rodelio Marcelo, hepe ng Criminal Investigation Detection Unit (CIDU), kay Chief  Supt. Edgardo G. Tinio, QCPD Director, kinilala ang namatay na si Joyce Santos, residente ng 108 Gil Fernando St., Bgy. Barangka, Marikina City.

Habang nasa kritikal na kondisyon sa The Medical City sina Ronbert Ycot, 36, empleyado ng Marikina City Hall, nakatira sa 19 Narra St., Mejia, Molave Neighborhood, Marikina Heights, at Duke Angelo David IIl, 20, store manager ng Tokyo Tokyo at residente ng 75 C. Lopez Jaena St., Brgy. Tanong, kapwa ng Marikina City.

Ayon kay Chief Insp. Marcelo, makaraan ang krimen ay sumuko ang suspek na si Jose Maria Abaya, 50, ng No. 21 J. Capital Tower E. Rodriguez St., Quezon City.

Kabilang sa mga isinuko ng suspek ang kanyang itim na Kawasaki Z1000 motorcycle ( ND 19092) at ang baril na Glock 22 Austria cal. 40 pistol, dalawang magazine at anim na cartridges.

Sa imbestigasyon, dakong 6:45 p.m. nang mangyari ang insidente sa Katipunan Ave., Brgy. White Plains, Quezon City.

Sinabi ni Chief Insp. Marcelo, sakay ang mga biktima ng kanilang puting Hyundai Grace van (TWJ-722)  na minamaneho Ycot, galing sa Megamall, Mandaluyong City at patungong San Mateo,  Rizal.

Pagdating ng sasakyan ng mga biktima sa Katipunan, bigla silang hinabol ng suspek na sakay ng kanyang motorsiklo at pinagbabaril .

Ayon kay Chief Insp. Marcelo, inakala raw ng suspek na kukunin siya ng puting van para dalhin sa rehabilitation center.

Napag-alaman mula kay Chief Insp. Marcelo, ang suspek ay may dati na rin kasong pamamaril noong Oktubre 2012 nang pagbabarilin at mapatay ang isang security guard at ikinasugat ng isa pa. Nabatid na dadalhin sana ng mga biktima ang suspek sa rehabilitation center.

Lumilitaw na dating pasyente si Abaya sa Silvercrest Foundation, isang rehabilitation center. Siya ay ipinasok noon sa rehab center makaraan masangkot sa paggamit ng droga.