HATAW! D'yaryo ng Bayan hatawtabloid.com
LILIPAD bukas ang Meralco Bolts upang mag-ensayo sa Las Vegas.
Kinompirma ng team manager nilang si Paolo Trillo na magkakaroon sila ng training camp sa Joe Ambunassar Impact gym na tatagal ng dalawang linggo.
Bahagi ito ng paghahanda ng tropa ni coach Norman Black para sa bagong PBA season na lalarga na sa Oktubre.
Ngayong off-season ay maraming pagbabago ang nangyari sa Meralco, una na rito ang pagkuha ng Bolts kay Jimmy Alapag mula sa Talk n Text at ang pag-trade kina Mike Cortez at James Sena sa Blackwater Sports.
Nagretiro na si Danny Ildefonso samantalang balik-Meralco si Rabeh Al-Hussaini pagkatapos na namalagi siya sa Kuwait upang asikasuhin ang ilang bagay tungkol sa kanyang pamilya.
Na-draft ng Meralco sina Chris Newsome at Baser Amer ngunit tanging si Newsome lang ang pumirma ng kontrata dahil naglalaro pa si Amer para sa San Beda Red Lions ng NCAA.
Idinagdag ni Trillo na inaayos na niya ang mga bagong kontrata nina Gary David at Reynel Hugnatan kaya mananatili silang dalawa sa Meralco ngayong bagong season.
(James Ty III)
