HATAW! D'yaryo ng Bayan hatawtabloid.com
PATAY ang isang 27-anyos buntis makaraan barilin ng kinakasamang retiradong pulis nang mapikon sa pagiging bungangera ng biktima kahapon ng madaling-araw sa Caloocan City.
Agad binawian ng buhay ang biktimang si Catherine Agudo, 27, residente ng Block 1A, Lot 30, Phase 3, E-1, Brgy. 14, Kaunlaran Village ng nasabing lungsod, dahil sa dalawang tama ng bala sa kaliwang dibdib.
Nagsasagawa ng manhunt operation ang mga awtoridad laban sa suspek na si Tito Cabauatan, nasa hustong gulang, naninirahan din sa naturang lugar, mabilis na tumakas makaraan ang insidente.
Batay sa ulat ni PO3 Michael Anthony Ramirez, dakong 1:10 a.m. naganap ang insidente sa loob ng bahay ng dalawa sa nasabing lugar.
Ayon sa kapatid ng biktima na si Sarha Agudo, 35, nagpapahinga sila sa loob ng kanilang bahay nang marinig nila ang ingay na nagmumula sa ikalawang palapag kung saan nakatira ang dating pulis at ang kanyang kapatid. Pagkaraan ay nakarinig sila ng putok ng baril.
Agad siyang umakyat sa ikalawang palapag at nasalubong niya ang suspek na nagsabing “Pinatay ko na ang kapatid mo, pagbabarilin ko na kayo” kaya mabilis siyang tumakbo.
Nabatid na apat buwan buntis sa ikatlong anak ang biktima habang ang suspek ay may dating asawang pulis din na matagal na niyang hiniwalayan.
(ROMMEL SALES)
