Ina nakatulog baby nahulog sa creek

LUMUTANG na walang buhay ang 6-buwan gulang na sanggol makaraan mahulog sa creek sa ilalim ng kanilang bahay nang makatulog ang ina habang nagpapadede sa Malabon City kahapon ng madaling-araw.

Lumobo at nangingitim na ang katawan ng biktimang si Janica Maceda nang maiahon ng kanyang inang si Josielyn, nasa hustong gulang, residente ng 47 E. Jacinto St., Brgy. Concepcion ng nasabing lungsod.

Batay sa ulat ng  pulisya, dakong 4 a.m. nang matagpuan ang lumulutang na katawan ng sanggol sa creek sa ilalim ng kanilang bahay sa nasabing lugar.

Salaysay ng lumuluhang ina, dakong 3 a.m. nagising siya upang padedehin ang sanggol hanggang muli siyang makatulog.

Nang magising siya ay hinanap ang kanyang anak ngunit wala na sa kanyang tabi hanggang mapansin na lamang na wala na ang nakaharang na plywood sa butas ng kanilang bahay.

Mabilis na humingi ng saklolo si Josielyn dahilan upang mataranta ang lahat ng kasama sa bahay hanggang makita sa creek ang lumulutang na bangkay ng sanggol.

(ROMMEL SALES)