Lebron James nasa Pinas na

DUMATING na sa Pilipinas ang superstar ng Cleveland Cavaliers na si LeBron James.

Lumapag ang private jet ni James kagabi at dumiretso siya sa isang hotel sa Makati kung saan doon siya mananatili sa susunod na tatlong araw.

Ang sikat na sapatos na Nike ang sponsor ng pagbisita ni James sa Pilipinas na huli niyang binisita noong 2013.

Ngayong hapon ay haharap si James sa mga manunulat sa isang press conference at pagkatapos ay didiretso siya sa Mall of Asia Arena kung saan haharapin niya ang mga batang kasali sa reality basketball show na Nike Rise ng TV5.

Noong isang linggo ay nag-alok ang Nike ng mga libreng ticket para sa pagbisita ni James sa MOA Arena ngunit inubos ito sa loob lang ng 15 na minuto.

Kagagaling lang si James sa pagkatalo ng kanyang Cleveland Cavaliers sa NBA Finals noong Hunyo kontra sa Golden State Warriors na pinangunahan ni Stephen Curry.

Si Curry naman ay susunod kay James sa pagbisita sa ating bansa sa Setyembre. (James Ty III)