HATAW! D'yaryo ng Bayan hatawtabloid.com
KAHIT newcomer pa lang ang grand winner sa Gandang Lalaki segment ng It’s Showtime na si Nikko Natividad, humahataw na agad ang kanyang showbiz career.
Kasama siya sa pelikulang Iglap ni Direk Neil Buboy Tan at sa Pare Mahal Mo Raw Ako, na pinagbibidahan nina Michael Pangilinan at Edgar Allan Guzman at mula sa pamamahal ni Direk Joven Tan.
Natutuwa si Nikko dahil unit-unting nagkakaroon ng katuparan ang kanyang mga pangarap sa buhay.
“Masaya po ako kahit na small role po. Alam ko naman po na may plano ang Diyos sa akin. Kaya ang ginagawa ko, tiyaga lang po at enjoy sa trabaho. Ang mahalaga po ay hindi po ako nawawalan ng project,” saad ng talent ni katotong Jobert Sucaldito.
Ano ang role niya sa mga pelikulang ito? “Doon po sa Iglap, kontrabida po ako. Doon sa isa pang movie, magbabarkada po kami nina Michael.”
Bading ba ang role mo sa movie ni Michael? “Hindi po ako bakla, pero may makaka-affair po akong transgender.”
Nabanggit pa ng 21 year old na Bulakenyo na si Coco Martin ang idol niya at gustong sundan ang yapak.
“Si Coco Martin po ang idol ko, magaling po kasi siya. Iyong pag-arte niya ay may hugot talaga na parang napagdaanan niya. Na parang pareho kami, waiter din ako sir e, pareho kaming mahirap at pareho kaming maagang nagtrabaho.
“Kaya inspirasyon ko sir si Coco at gusto kong gayahin siya na isang magaling na actor,” saad pa ni Nikko.
ALAM MO NA! – Nonie V. Nicasio
