Kagawad itinumba ng vigilante (Nag-sideline sa pagtutulak ng shabu)

PATAY ang isang barangay kagawad na sinasabing sideline ang pagtutulak ng droga, makaraan pagbabarilin ng dalawang miyembro ng vigilante group sa harap ng kapilya na lamayan ng patay sa Malabon City kahapon ng madaling araw.

Hindi na umabot nang buhay sa Valenzuela Medical Center ang biktimang kinilalang si Fernando “Boy” Vergara, 58, kagawad ng Brgy. Panghulo at residente sa Tahimik St., sanhi ng dalawang tama ng bala ng kalibre .45 baril sa dibdib.

Tinutugis na ng mga awtoridad ang mga suspek na mabilis na tumakas makaraan ang insidente.

Batay sa ulat nina PO3 Rommel Habig at PO3 Erwin Gupaal, dakong 4:45 a.m. nakikipaglamay sa burol ng isang kalugar at habang nakaupo ay dumating ang isang motorsiklo lulan ang dalawang suspek na nakasuot ng helmet.

Bumaba ang isa sa mga suspek at nilapitan ang biktima saka walang sabi-sabing pinagbabaril si Vergara.

Pagkaraan ay mabilis na tumakas ang mga suspek habang dinala ng mga kaanak ang biktima sa pagamutan ngunit hindi na umabot nang buhay.

Pahayag ng barangay chairman ng Panghulo na si Esmer Borja, sangkot si Vergara sa pagpapakalat ng ilegal na droga sa kanilang barangay at minsan ay pinayuhan niyang tumigil na hanggang sa mapatay ang biktima.