HATAW! D'yaryo ng Bayan hatawtabloid.com
ANG Mall of Asia Arena sa Pasay City ang magiging venue ng pagbabalik ni Cleveland Cavaliers superstar LeBron James sa Pilipinas sa Agosto 20.
Sa nasabing petsa ay iaanunsiyo ang mga 12 na miyembro ng Nike Rise team kung saan si James mismo ay magbibigay ng mensahe sa kanila.
Makakasama ni James ang pinuno ng Nike Rise na si dating Gilas Pilipinas coach Chot Reyes at mapapanood ito sa TV5 sa Agosto 30, alas-sais ng gabi.
Unang nagdaos si James ng basketball clinic sa MOA Arena noong Hulyo 2013 na ang Nike din ang naging sponsor niya.
Magsisimula ang “Rise Beyond Belief” ni James sa alas-siyete ng gabi sa MOA Arena at magbubukas ang mga pinto ng venue sa alas-sais.
Ang mga nais na manood ay puwedeng mag-register sa www.nike.com/rise simula ngayong alas-nuwebe ng umaga hanggang hatinggabi.
Samantala, bukod kay James ay nakatakda ring bumisita sa bansa ang iba pang mga NBA superstars tulad nina Steph Curry ng Golden State Warriors, Ricky Rubio ng Minnesota Timberwolves, Kenneth Faried ng Denver Nuggets at Danny Green ng San Antonio Spurs.
(James Ty III)
