Bosero bugbog sarado (Huli sa akto ng promo girl)

BUKOL at pasa ang inabot ng isang manyakis na lalaki makaraan pagtulungan gulpihin ng mga tambay nang mahuli sa aktong namboboso gamit ang cellphone sa promo girl na kanyang kapitbahay habang naliligo ang biktima sa Caloocan City kamakalawa ng umaga.

Bagsak sa kulungan ang suspek na Mark Louie Manuel, 20, residente ng P. Galauran St., 7th Avenue Grace Park ng nasabing lungsod, nahaharap sa kaukulang kaso.

Batay sa ulat ng pulisya, dakong 7 a.m. nang mahuli sa akto ang suspek habang sarap na sarap sa pamboboso sa hubo’t hubad na naliligong 24-anyos babaeng kapitbahay.

Sinasabing napansin ng biktima ang kamay na may cellphone na nagre-record sa kanya habang naliligo dahilan upang humingi ng tulong.

Inabutan ng mga tambay sa bubong ang suspek kaya sapilitan siyang pinababa saka pinagtulungang gulpihin saka dinala sa himpilan ng pulisya upang sampahan ng kaso.