San Beda vs JRU

Mga Laro Ngayon (The Arena, San Juan)
2 pm – Jose Rizal U. vs. San Beda
4 pm – Arellano U. vs. Perpetual Help

IKAAPAT na sunod na panalo ang hihiritin ng defending champion San Beda Red Lions at Jose Rizal Heavy Bombers sa kanilang pagkikita sa  91st National Collegiate Athletic Association (NCAA) men’s basketball tournament mamayang 2 pm sa The Arena sa San Juan.

Sa ikalawang laro sa ganap na 4 pm ay magsasalpukan naman ang Arellano Chiefs at Perpetual Help Altas na kapwa naghahangad na makabangon sa kabiguan.

Ang Red Lions ay nasilat ng Letran Knights, 93-80 noong Hulyo 16. Matapos iyon ay nagposte ng tatlong sunod na panalo ang tropa ni coach Jamike Jarin upang umangat sa solo second place sa kartang 5-1.

Ang Heavy Bombers ni coach Vergel Meneses ay nakalasap ng back-to-back na pagkatalo sa Letran (78-62) at San Sebastian (91-89). Mula noon ay nagtala ng tatlong sunod na panalo ang JRU.

Umaasa pa rin si Jarin kina Olaide Adeogun at Art dela Cruz. Sa kasalukuyan ay pinupunan nina Rysuei Koga at Dan Sara ang pagkawala ng lead point guard na si Baser Amer na mayroong injury.

Ang JRU ay pinangungunahan nina Abdel Poutouochiat Rassak Abdul Wahab. Nakakatuwang nila sina Paolo Pontejos, Tey Teodoro at Mark dela Virgen.

Ang JRU, Arellano at Perpetual Help ay kapwa may 4-2 records.

Napatid ang four-game winning streak ng Arellano Chiefs ni coach Jerry Codinera nang sila ay payukuin ng Letran, 77-68 noong Biyernes upang bumagsak sa 4-2.

Ang Altas, na ginagabayan ni coach Aric del Rosario, ay galing naman sa back-to-back na kabiguan buhat sa Letran (79-71) at San Beda  (83-81).

( SABRINA PASCUA  )