HATAW! D'yaryo ng Bayan hatawtabloid.com
MARAMI ang nagulat sa ipinakikita ng Letran Knights, walang nag-aakalang nasa tuktok sila ng team standings ng NCAA Season 91.
Kulang sa height ang mga bataan ng bagong coach na si Aldin Ayo pero tinalo ng Intramuros-based squad Letran ang mga matatangkad na teams tulad ng five-time defending champion San Beda College Red Lions at Perpetual Help Altas.
Isa sa mga naghirap para ilista ng Knights ang malinis na anim na panalo ay si Kevin Racal matapos nilang talunin ang Arellano University Chiefs, 77-68.
Kumana si Racal ng 24 points kasama ang tatlong three-point shot at limang rebounds upang iposte ng fifth-year forward ang best game bago matapos ang first round.
“We’re so small, I’m using K-Racs (Racal) as a four when he usually plays two or three,” ani Ayo.
At sumapat ang ipinakitang tikas ni Racal para tanghaling ACCEL Quantum-3XVI/NCAA Press Corps Player of the Week award.
May Average na 11.8 points, 5.6 rebounds at 2.0 assists si Racal na unti-unting bumabalik ang dating laro matapos malasap ang ACL injury nung nakaraang taon.
Sa huling laro nila kontra last season’s runner-up, ipinakita ni Racal na naka recover na ito sa kanyang injury. (ARABELA PRINCESS DAWA)
