Obrero kritikal, 1 pa sugatan sa saksak ni lolo (Nagkasagutan sa inoman)

KRITIKAL ang kalagayan sa pagamutan ng isang obrero habang sugatan ang isa pa makaraan saksakin ng isang 60-anyos lolo na kainoman ng mga biktima kamakalawa ng gabi sa Navotas City.

Nilalapatan ng lunas sa Tondo Medical Center ang biktimang si Armel Laquindanum, 28, ng 129 Mapalad St., sanhi ng isang tama ng saksak sa dibdib.

Pinauwi na makaraan gamutin ang sugat sa hita ng kasama niyang si Lorene Dela Cruz, 18, ng 139 Marikit St., kapwa ng Brgy. Tangos.

Pinaghahanap ang suspek na si Abraham Mangali, 60, ng 149 Masipag St., mabilis na tumakas makaraan ang insidente.

Sa ulat ni PO2 Allan Bangayan, dakong 8 p.m. nang maganap ang insidente sa loob ng bahay ng suspek sa nasabing barangay.

Dakong 5 p.m. nagsimulang mag-inoman ang grupo ngunit nang malasing na dakong gabi ay nagkaroon ng pagtatalo.

Ang pagtatalo ay humantong sa suntukan hanggang kumuha ng patalim ang suspek at sinaksak sa dibdib si Laquindanum.

Tinangkang umawat ni Dela Cruz ngunit sinaksak din siya ng suspek na mabilis na tumakas makaraan ang insidente.