Salutatorian Krisel Mallari maaari nang magkolehiyo

MAKAPAPASOK na sa kolehiyo si Krisel Mallari, ang salutatorian sa kumalat na kontrobersyal na video na pinigil ng mga opisyal ng kanyang paaralan sa kanyang pagtatalumpati sa graduation ceremony. 

Ito’y matapos utusan ng Court of Appeal (CA) ang Santo Niño Parochial School (SNPS) na bigyan si Mallari ng certificate of good moral character. 

Matatandaan, pinigil ang talumpati ni Mallari sa kanilang graduation ceremony nang kuwestiyonin niya ang sistema sa pagpili ng valedictorian at salutatorian gayong karapat-dapat siyang magtapos na nangunguna sa kanilang klase.

Dahil umnao sa inasal ni Mallari kaya tumanggi ang SNPS na bigyan siya ng Certificate of Good Moral Character. 

Ang naturang sertipikasyon ay isa sa mga requirement para makapasok si Mallari sa University of Sto. Tomas (UST) na nakapasa siya para kumuha ng kursong accountancy.

Nagbunsod ito para tumakbo sa CA ang pamilya ng estudyante at kuwestyonin ang aksyon ng paaralan. 

Sa resolusyon ng ikalawang dibisyon ng CA, inaprubahan ang hiling ni Mallari na temporary restraining order (TRO). 

Paliwanag ng korte, sa Agosto 2015 na ang pasukan sa UST kaya mahalagang matanggap agad ng SNPS ang kanilang resolusyon. 

Inutusan ng korte ang SNPS na magsumite ng komento sa loob ng 10 araw. Makaraan ito, magsusumite ang kampo ni Mallari ng tugon sa loob ng limang araw.