Palasyo dumepensa

IDINEPENSA ng Malacañang ang pagiging mahaba ng huling State of the Nation Address (SONA) ni Pangulong Benigno “Noynoy” Aquino III.

Ayon kay Presidential Communications Secretary Herminio “Sonny” Coloma Jr., desisyon ng Pangulo na gawing komprehensibo ang laman ng kanyang huling SONA.

Layon din aniyang maipaunawa sa taumbayan ang mga ipinatupad na reporma ng Aquino administration sa nakalipas na limang taon.

Matatandaan, umabot nang mahigit dalawang oras ang SONA ng pangulo na kinapalooban ng pagpapasalamat sa lahat ng mga tumulong sa kanya sa trabaho o personal man.

Depensa ni Secretary to the Cabinet Rene Almendras, tinatrabaho pa ng gobyerno kaya hindi nabanggit sa SONA kabilang ang Freedom of Information Bill at sitwasyon sa Ninoy Aquino International Airport (NAIA).

Ayon sa kalihim, hindi rin naisali sa SONA ang ilang proyekto sa ilalim ng Public-Private Partnership Program dahil hindi pa tapos.

Sa isyu ng Mamasapano incident, sinabi ni Almendras na ipinauubaya na ito ni Aquino sa husgado.