Sundalo, 2 NPA patay 6 sugatan sa sagupaan

DAVAO – Nagpapatuloy ang pursuit operations ng mga sundalo laban sa mga rebelde sa Sitio Camarin, Napnapan, Pantukan, Compostela Valley Province makaraan ang enkwentro na ikinamatay ng tatlo katao.

Sa nasabing sagupaan, patay ang isang sundalong miyembro ng 71st Infantry Battalion Philippine Army, at dalawang hindi pa kilalang miyembro ng New People’s Army (NPA).

Ayon kay Capt. Alberto Caber, Public Information Officer ng Eastern Mindanao Command (EastMinCom), nasasagawa ang mga sundalo ng security patrol nang paulanan sila ng bala ng hindi kukulangin sa 50 NPA sa pamumuno ni alyas Ka Maruz.

Sinabi ni Caber, ang dalawang namatay na NPA ay dinala ng kanilang mga kasamahan at itinago sa loob ng kagubatan.

Bukod sa paghahabol sa tumakas na mga NPA, hinahanap din ng mga sundalo ang bangkay ng dalawang rebelde upang mailibing at maisama sa kanilang ‘documentation.’