Arraignment ng ex-Chief Justice muling iniliban (Sa tax evasion case)

MULING iniliban ang arraignment sa tax evasion case na kinakaharap ni dating Chief Justice Renato Corona.

Ito na ang ika-10 beses na ipinagpaliban ng Court of Tax Appeals ang arraingnment ng impeached chief justice.

Itinakda sa Setyembre 7 ang arraignment ni Corona.

Ayon sa Court of Tax Appeals, may nakabinbing petition for review ang depensa na inihain sa court en banc.

Iginiit ng abogado ni Corona na si Atty. Rean Balisi, na-arraign na ang dating punong mahistrado para sa paglabag sa Section 255 ng Internal Revenue Code kaya hindi siya maaring basahan ng sakdal sa mga paglabag sa Section 254 at 255.

Samantala, ibinasura ng Court of Tax Appeals ang mosyon ng depensa na ipagpaliban ang preliminary conference at pre-trial sa kasong paglabag ni Corona sa Section 255 ng Internal Revenue Code.

Nagpasya ang korte na tuloy ang preliminary conference kahapon at ang pre-trial na itinakda sa Hulyo 29, araw ng Miyerkoles.

Dumalo sa pagdinig kahapon si Corona kasama ang maybahay niyang si Cristina.