300 residente naospital sa kontaminadong tubig (Sa Sarangani)

GENERAL SANTOS CITY – Mahigpit na tinututukan ng Municipal Health Office ng Alabel, Sarangani Province, ang Brgy. Pag-asa sa nasabing munisipyo dahil sa naitalang diarrhea outbreak.

Ito’y nang umabot sa 300 tao ang dinala sa ospital sa Lungsod ng Heneral Santos dahil sa nararanasang pagtatae.

Ayon kay Dr. Honorato Fabio, municipal health officer ng Alabel, nasa pitong purok na sa Brgy. Pag-asa ang apektado ng nabanggit na sakit.

Sa imbestigasyon ng Municipal Health Office, napag-alamang ang mga residente ay kumukuha ng inuming tubig sa ilog doon sa lugar.

Pinaniniwalaang kontaminado ang tubig bunsod ng nangyaring mga pag-ulan sa nakaraang mga linggo.

Napag-alaman ding karamihan sa mga residente sa naturang lugar ay walang palikuran o banyo.