Bembol Roco, beki?

Isang gay role ang gagampanang muli ng batikang aktor na si Bembol Roco sa darating na episode ng Karelasyon.

Makakasama niya rito ang nagbabalik-tambalang sina Alden Richards at Louise de los Reyes.

Iikot ang istorya sa buhay ng binatang si Adrian (Alden) na may ambisyong maging parte ng makulay na mundo nang showbiz. Naniniwala siyang sa pag-aartista ay sisikat na siya, marami ka pa siyang kikitaing pera. At nang makilala niya ang talent scout at manager na si Warren (Bembol), tila naging mas abot-kamay ang pangarap niyang ito.

Lahat ng suporta sa magiging showbiz career at pinansyal na pangangailangan ay handang ibigay ni Warren para kay Adrian. Subalit sa anong kapalit?

Masasagot ito sa pagdating ng babaeng si Veronica (Louise) sa pagitan nilang dalawa.

Hanggang saan lang ba dapat ang maging papel ni Warren sa buhay ni Adrian? Sagabal nga ang pagkakaron ng pag-ibig sa ambisyon ng isang nais mag-artista?

Tampok sina Alden Richards, Louise delos Reyes at Bembol Roco, sa panulat ni Jerome Zamora at direk- syon ni Adolf Alix, Jr., ilalahad ang mainit na kwentong ito ni Carla Abellana sa Karelasyon. Ngayong Sabado na, July 18, 2:30pm pagkatapos ng Eat Bulaga sa GMA.
BANAT – Pete Ampoloquio, Jr.