Employer na tatakas sa 13th month pay parusa pabibigatin

HINILING na pabigatin ang parusa sa mga employer o kompanya na hindi magbibigay ng mandatory 13th month pay sa mga manggagawa.

Ito ang laman ng inihaing House Bill No. 4196 ni Cagayan De Oro Rep. Rufus Rodriguez.

Sa ilalim ng panukalang batas, pagmumultahin nang tatlong beses katumbas ng 13th month pay ng manggagawa ang lalabag.

Maaari rin makulong ng tatlo hanggang anim taon, depende sa magiging desisyon ng hukuman.

Batay sa umiiral na batas, mumultahan ng P1,000 hanggang P10,000 at kulong na isa hanggang tatlong taon ang mapatutunayang may paglabag.

Ayon sa Department of Labor and Employment (DoLE), nakatatanggap pa rin sila ng mga reklamo mula sa ilang manggagawa na hindi nabibigyan ng 13th month pay na iniutos sa ilalim ng Presidential Decree No. 851.