Ella, umaarangkada sa TV5 kahit ipinahiram lang ng Dos

MASUWERTE pa rin itong si Ella Cruz dahil kahit wala siyang project sa ABS-CBN, umaarangkada naman siya sa TV5. Pagkatapos kasi niyang makasama sa Wattpad Presents: Hot and Cold, kasama naman siya sa #ParangNormal Activity.

Bale ipinahiram muna ng ABS-CBN si Ella sa TV5. Si Ella ang solong babaeng bida sa horror-comedy show na nagsimula nang mapanood noong sa July 11, 8:00 p.m..

Ang #ParangNormal Activity ay masasayang adventures at misadventures ng mga barkadang tututukan sa TV—ang mga nakaaaliw at cute na mystery-solving kids. Tungkol kasi ito sa apat na magkakaibigang miyembro ng Paranormal Club na lulutas ng mga misteryo sa kanilang paaralan. Makakalaban nila ang iba’t ibang supernatural creatures at mga elementong tulad ng multo, manananggal, zombie at iba pa. Pero ang twist, ghost din pala ang isa sa mga bida.

Ginagampanan ni Ella ang katauhan ni Charlie, isang matalino, charming at friendly ghost na tutulong sa grupo para malutas ang mga kababalaghan habang tinuturuan sila kung paano mas maiintindihan ang mga kakaibang elementong nakakasalamuha nila.

Ayon kay Ella, ibang-iba ang role niya sa #ParangNormal Activity kompara sa Bagito ng ABS-CBN na ginagampanan niya ang papel ni Vanessa.”Balik-wholesome po ako rito. At ang tindi ng costume requirements ko kada taping, lagi akong naka-school uniform,” kuwento ni Ella.

Nagpapasalamat si Ella na tuloy-tuloy siyang binibigyan ng project ng TV5 gayundin sa tiwalang ipinagkakaloob sa kanya ng team nina Perci Intalan at Jun Lana ng The Idea First Company.

“Hindi ako taga-TV5 pero ikinonsidera pa rin nila ako. I’m really happy to be working with them,” giit pa ni Ella.

SHOWBIZ KONEK – Maricris Valdez Nicasio