Taxi driver sugatan sa boga ng holdaper

SUGATAN ang isang taxi driver makaraan barilin ng holdaper nang isalpok niya ang sasakyan at tumakbo kamakalawa ng gabi sa Valenzuela City.

Ginagamot sa Valenzuela Medical Center ang biktimang kinilalang si Bobby Regalado, 32, ng Block 5, Laon Compound, C. Molina St., Brgy. Veinte Reales ng nasabing lungsod, sanhi ng isang tama ng bala ng hindi nabatid na kalibre ng baril sa kanang balikat.

Habang mabilis na tumakas ang suspek na walang nakuhang kahit ano nang isalpok ni Regalado ang taxi sa tabi ng kalsada.

Batay sa ulat ni PO2 Joel Madregalejo, dakong 8:45 p.m. nang maganap ang insidente sa ‘dead-end’ ng Chicago St., Brgy. Lingunan ng lungsod.

Pinara ng suspek ang Daedalus taxi (TVX-992) na minamaneho ng biktima at nagpahatid sa nasabing barangay ngunit pagsapit doon ay nagdeklara ng holdap.

Mabilis na isinalpok ng driver ang taxi sa tabing-kalsada bago mabilis na binuksan ang pintuan sabay takbo ngunit pinaputukan siya ng suspek.

Rommel Sales