Negosyante, lover pinatay, sinilaban

ILOILO CITY – Kapwa patay at sunog ang katawan nang matagpuan ang isang negosyante at ang kinakasama niyang babae sa loob ng calibration shop sa Brgy. Tagbak, Jaro, Iloilo City kamakalawa ng gabi.

Ang mga biktima ay kinilalang si Jose Daliva, 52, may-ari ng JD calibration shop, at ang kinakasamang si Jolen Alvaran Lara, isang call center agent.

Ayon kay Fire Supt. Jerry Candido, halos tupok na ang katawan ng mga biktima nang kanilang madatnan.

Ngunit sa pag-usisa, hindi ang pagkakasunog ang dahilan ng pagkamatay ng mga mga biktima.

Ang bangkay ng lalaki ay nakitang nakabalot sa plastic at may laslas ang leeg habang nasa ilalim ng kanyang sasakyan.

Habang ang babae ay may naiwan pang kutsilyo na nakasaksak sa dibdib.

Naniniwala si Candido na pinatay muna ang mga biktima at pagkatapos ay sinunog ang calibration shop bilang diversionary tactics.

Sa ngayon, blanko pa ang mga awtoridad kung sino ang suspek at kung ano ang motibo ng krimen.

Ang lalaki ay tatlong taon nang hiwalay sa kanyang misis at sinasabing maayos ang relasyon sa kanyang pamilya.