Mag-asawa patay sa taga ng utol ni mister

ZAMBOANGA CITY – Patay ang mag-asawa makaraan pagtatagain ng kapatid ng mister sa loob ng kanilang bahay sa Barangay New Katipuna, Dimataling, Zamboanga del Sur kamakalawa.

Kinilala ang mga biktimang si Belbestre Sumuso Pintor, 33, at misis niyang si Merlyn Dapanas, 28.

Batay sa report ng Police Regional Office (PRO-9), mismong ang bunsong kapatid ng lalaking biktima na kinilalang si Lemuel Pintor Sumuso, 28, ang responsable sa krimen.

Sinasabing sumugod sa bahay ng mag-asawa ang suspek na nauwi sa alitan hanggang pinagtataga ang mga biktima.

Agad binawian ng buhay ang mga biktima bunsod ng matitinding sugat sa kanilang katawan.

Napag-alaman ng pulisya, personal na galit ang motibo sa pananaga dahil dati nang may alitan ang suspek at ang mag-asawa.

Boluntaryong sumuko sa kanilang barangay chairman ang suspek dala ang ginamit niyang itak sa pananaga.