Lady Eagles hahataw sa unang araw ng V League

MAGPAPASIKLAB ang defending UAAP champion Ateneo de Manila kontra University of Santo Tomas sa unang araw ng Second Conference ng Shakey’s V League Season 12 sa Hulyo 11 sa San Juan Arena.

Sa pangunguna ni Alyssa Valdez, llamado ang Lady Eagles kontra Tigresses sa unang laro sa alas-12:45 ng tanghali.

Ginabayan ni Valdez ang PLDT Home Ultera sa titulo ng Open Conference noong isang buwan at siya pa rin ang inaasahan ni coach Tai Bundit para sa Ateneo na winalis ang kalaban noong huling UAAP season.

Ang UST naman ay babanderahan ng mga kakampi ni Valdez sa national U23 team sa pangunguna nina Ria Meneses at Pam Lastimosa.

Sa ibang mga laro sa Hulyo 11, magtutunggali ang Far Eastern University at University of Baguio sa alas-tres ng hapon at San Sebastian College kontra College of St. Benilde sa alas-singko.

Kinabukasan, maghaharap ang National University kontra University of the Philippines sa alas-12:45, La Salle-Dasmarinas kalaban ang Technological University of the Philippines sa alas-tres at ang kampeon ng NCAA na Arellano University kontra Polytechnic University of the Philippines sa alas-singko.

Ang unang laro tuwing Sabado at Linggo ay mapapanood nang live sa GMA News TV Channel 11 habang ang iba pang mga laro ay mapapanood nang delayed mula Lunes hanggang Biyernes sa parehong istasyon simula ala-una ng hapon. (James Ty III)