3 Koreano negatibo sa MERS

NEGATIBO sa Middle East Respiratory Syndrome-Corona Virus (MERS-CoV) ang tatlong South Koreans na una nang kinakitaan ng sintomas ng nakamamatay na sakit.

Ayon kay Department of Health spokesperson Dr. Lyndon Lee Suy, nananatiling ligtas sa MERS ang bansa.

“The results of the laboratory tests already came out and they are negative for MERS-CoV,” banggit niya.

Sinabi ni Lee Suy, ginagamot na lang ang lagnat, ubo at sipon ng tatlong Koreano.

Gayonman, mananatiling nakaalerto ang DoH para mapigilang makapasok sa bansa ang nakamamatay na sakit.

Lunes nang boluntaryong magpatingin sa Manila Doctors Hospital ang tatlo at saka dinala sa Research Institute For Tropical Medicine (RITM) sa Alabang.

‘Asymptomatic’ o hindi nakitaan ng ano mang sintomas ang tatlo nang dumating sa bansa ngunit nilagnat at inubo kalaunan kaya nagpasuri.

Ayon kay Lee Suy, bumiyahe ang tatlo sa South Korea kung saan may MERS-CoV outbreak kaya awtomatiko silang isinailalim sa virus testing.