Preso inatake sa selda, tigok

PATAY ang isang 48-anyos presong dating guro makaraan atakehin sa puso sa loob ng kulungan sa Manila Police District Station 1 sa Tondo, Maynila.

Binawian ng buhay habang dinadala sa Gat Andres Bonifacio Hospital ang biktimang si Jerry Serrano, walang asawa, nakatira sa 1611 Silangan Street, Caloocan City.

Ayon sa imbestigasyon ni PO3 Michael Marragun, ng Manila Police District Homicide Section, dakong 9:45 a.m. nang atakehin sa puso ang biktima sa loob ng selda.

Napag-alaman, humingi ng tulong ang biktima sa mga pulis nang manikip ang dibdib dahil sa matinding init ng panahon.

Isinugod ang biktima sa pagamutan ngunit hindi na umabot nang buhay.

Leonard Basilio