3 patay, 2 sugatan sa baha, landslide sa S. Cotabato

KORONADAL CITY – Tatlo na ang naitalang namatay habang dalawa ang sugatan sa malawakang pagbaha at landslide sa lalawigan ng South Cotabato dulot nang malakas na pagbuhos ng ulan.

Kinilala ang dalawa sa mga namatay na sina Nonoy Ga, 74, at Molina Ga, 71, mga residente ng Purok Tinago, Sitio Aksaon, Bonao, Tupi, South Cotabato, natabunan ng lupa sa naganap na landslide sa nabaggit na lugar.

Ayon kay MDRRMO Emil Sumagaysay ng bayan ng Tupi, natagpuan ang mag-asawang Ga sa bahay kubo na tinuluyan nila sa kanilang bukid.

Habang patuloy pang inaalam ang pangalan ng isa pang namatay at mga nasugatan sa bahagi ng Sitio Lamflawan, Brgy. Lunen.

Sa nabanggit na bayan, halos anim na mga barangay ang apektado ng pagbaha.

Samantala, tuluyan nang nawasak ang dalawang tulay sa Lungsod ng Koronadal.

Halos lahat ng mga barangay sa Koronadal City ang apektado ng pagbaha dulot ng pagbuhos ng ulan.