3 nene nireyp ng amain sa Dagupan

DAGUPAN CITY – Pinayuhan ng Women’s and Children’s Protection Desk (WCPD)-Dagupan ang ina ng tatlong menor de edad na ginahasa ng kanyang live-in partner, na dalhin ang mga anak sa pangangangalaga ng Department of Social Welfare and Development (DSWD).

Ito’y para matiyak ang kaligtasan ng mga bata at maisailalim sila sa counseling dahil sa trauma na sinapit mula sa kamay ng kanilang amain.

Nais matiyak ng tanggapan na maayos ang kalagayan ng mga biktima lalo’t pawang mga menor de edad at may gulang na sampu, siyam at walo.

Napag-alaman, unang ginahasa ng suspek ang panganay sa magkakapatid simula noong siya’y Grade 2 pa lamang.

Ginagawa ng suspek ang panghahalay sa kanila tuwing naglalabada ang kanilang ina at wala sa kanilang bahay.

Dahil dito, nais ng panganay na biktima na mabulok sa kulungan ang suspek upang mabigyan ng hustisya ang mapait na sinapit nila ng kanyang mga kapatid.