DPWH modelong kagawaran — PNoy

MULA sa pagiging pinakatiwaling ahensiya ng pamahalaan ay naging modelong kagawaran na ang Department of Public Works and Highways (DPWH) sa panahon ng administrasyong Aquino.

Ito ang papuri ni Pangulong Benigno Aquino III sa DPWH sa ika-117 anibersaryo ng kagawaran kahapon.

“Kung may ahensiya sa gobyerno na dapat tularan sa pagpapaginhawa sa kalagayan ng taumbayan, DPWH iyan. Ang dating poster boy ng katiwalian, ngayon ay modelo na ng episyenteng pamamalakad.Wala nang palakasan. Wala nang pa-pogi,” ayon sa Pangulo sa kanyang talumpati.

Binigyang-diin ng Punong Ehekutibo, ang buong estratehiya ng pagrereporma sa DPWH ang tinaguriang 5Rs, “Right projects, at the right cost and right quality, and accomplished at the right time with the right people.”

Ipinangako ng Pangulo na daragdagan ang budget ng DPWH sa susunod na taon.

Rose Novenario