Ang paliwanag ni S/Supt. Mar Pedrozo

NAKATANGGAP ang aming pahayagang HATAW ng liham-klaripikasyon mula kay S/Supt. Marcelino Pedrozo Jr., kaugnay ng naikolum ng inyong lingkod na opisyal ng Manila Police District na umano’y kinuyog o binugbog ng mga galit na vendor sa Divisoria.

Nabanggit din natin sa nasabing kolum noong nabugbog naman siya ng mga adik at pusher sa Balic-Balic noong araw.

Pareho pong itinanggi ni Kernel Pedrozo ang dalawang insidente.

Aba ‘e kung totoong hindi siya nabugbog sa Divisoria at sa Balic-Balic, ‘e mabuti naman kung ganoon.

Natutuwa tayo kung hindi naman pala totoo ang naikuwento sa atin ng ating mga impormante.

Sa totoo lang, concern lang naman tayo sa kanya.

Lalo na ‘yung pagkakaospital mo raw.

At gaya ng iyong pagkaklaro, gusto rin natin linawin na ang inyong lingkod ay walang layunin na siraan o laitin ang iyong reputasyon kundi ang sa atin ay pagmamalasakit lamang sa iyo.

Lalo na ngayong nilinaw mo sa iyong sulat na ang ginawa ninyo sa Divisoria ay lehitimong ‘clearing operations.’

Ang sabi mo nga ay lehitimo ang nasabing operasyon dahil utos iyon ni MPD Director, Gen. Rolando Z. Nana.

Napakalaking clearing operations pala niyan Kernel Pedrozo dahil in full force kayo ng TF Organize Vending of Manila City Hall, TF Divisoria, PS-2, PS-11 at District Public Safety Battalion (DPSB) kasama ang SWAT Team.

Ang daming unit niyan.

Mabuti  naman at nahuli ninyo ang isang Abdul Rakman Hunos Masogalao, ang nag-iisang naaresto at nakasuhan ng resisting arrest and assault on person in authority.

Sa laki ba naman ng operation na ‘yan, e parang nasasayangan tayo kung wala man lang kayo nahuli kahit isa, ‘di ba?

Pero bakit pinalabas at hindi naman daw nasampahan ng kaso si Abdul Rakman, Sir Pedrozo?

Hindi rin po talaga tayo nagga-gather ng facts lalo na kung tsismis lang. Legitimate news lang po.

Alam mo ba Kernel Pedrozo, na ilang tauhan pa ng SWAT ang nagpakalat ng balitang ‘yan?  

Nagkataon lang Kernel Pedrozo na may umiyak na  ilang Muslim vendors dahil nagkaroon ng physical contact during the clearing operations at maging ang paninda nila ay sinira o kinompiska ng ilang pulis na kabilang d’yan sa clearing operations ninyo.

Marami ka na rin naman naging kaibigan na negosyante at maliliit na vendor. Alam na alam mo Kernel kung paano masaktan ang isang vendor kapag hindi na sila nakapagtinda kinabukasan. Wala na silang kita, magbabayad pa sila sa 5/6.

‘Di ba Kernel Pedrozo?

Anyway, sorry kung nasaktan ang damdamin ninyo IDOL Kernel Pedrozo.

Gusto lang din natin ng klaripikasyon, mabuti naman po at nagkakaintinidhan tayo pagdating sa bagay na ‘yan.

Sinusuportahan din po ng inyong lingkod ang inyong kampanya laban sa illegal vendors.

Sana po ay para sa lahat na ‘yan.

By the way Kernel Pedrozo, gusto mo rin lang naman na malinis ang Divisoria at ibang palengke sa Maynila, puwede ho bang paki-monitor n’yo at hulihin ang mangongotong diyan na sina alias MEDY-NA at TATA JAMES kahit binuwag na ang TF-Divisoria!?

Aasahan ko po ‘yan Sir!

Mas may delicadeza si Immigration Ex-Commissioner Ricardo David Jr.

Pinatunayan ni dating Immigration Commissioner Ricardo David Jr., na mayroon siyang delicadeza dahil nang madawit ang kanyang pangalan sa kontrobersiya, siya ay boluntaryong nagbitiw sa kanyang puwesto sa Bureau of Immigration (BI).

At dahil doon, nagkaroon ng pagkakataon si ret. Gen. Ric David na mag-”grand graceful exit” sa Bureau na minsan niyang minahal.

Kumbaga, hanggang sa huling araw ng panunungkulan ay naninindigan si David na siya ay mayroong integridad.

At bilang isang military man ay nakita rin sa kanya ang pagiging ‘an officer & a gentleman.’

Kaya naman kahit napupuna natin si David noong araw ay saludo pa rin tayo sa kanya!

 (Isa lang naman daw ang matigas ang dila ‘este’ mukha d’yan sa BI, ‘yung isang opisyal na kinatatakutan ngayon nang lahat dahil parang ‘hari’ at ‘diktador’ na hindi dapat mabali ang utos!?)

Nitong mga nakaraang linggo, nasangkot sa kontrobersiya ang BI nang pumutok sa isang broadsheet ang balita tungkol sa binansagang Chinese crime lord na si Wang Bo na umano’y nakatakdang magbigay ng payola sa mga mambabatas na papabor sa Bangsamoro Basic Law (BBL).

Mahigit P500 milyones ang pinag-uusapang halaga sa kontrobersiyang ito na dinadawit ang pangalan ng dalawang BI associate commissioners.

Pero agad pumalag sina BI Associate Commissioners Abdullah Mangotara at Gilbert Repizo sa balitang ‘yun na halatang-halata na demolition job sa kanila at sa Liberal party.

S’yempre hindi natuwa ang Palasyo dahil nakaladkad rin ang Malacañang sa nasabing ‘black propaganda’ na gawa umano ng isang media sulsoltant ‘este consultant d’yan sa BI main office.

Pero ang higit na nakagugulat nang maglabas ng praise ‘este press release si Mison through his spokesperson, Atty. Elaine Tan, na sinasabing hindi magre-resign ang huli.

Ayon kay Atty. Tan, ang nasabing black propaganda ay kagagawan pa umano ng isang cabinet official mula sa makakaliwang grupo.

Gusto umano ng nasabing cabinet official, na kopohin ang BI para gamitin ang resources nito para sa 2016 elections.

What the fact, Atty. Tan!?

Pero nang muling pumutok ang istoryang ito sa parehong pahayagan, at nag-react ang isang gabinete ni Pnoy ay muli na namang nag-deny to death ang BI spokesperson.

Wala umano siyang ipinalalabas na ganoong pahayag o kahit ang kanyang bossing na si Mison.

 Hello?!

 Ano ‘yang press statement na natanggap ng mga reporter sa Malacañang?     

 Guniguni?!

Ay sus!

Droga at video karera sa Brgy 518 Sampaloc, Manila

Bakit ayaw bigyan ng aksiyon ng MPD ang aming inirereklamong talamak na droga at vi-deo karera? Ang mga kabataan ay nalululong na sa masamang bisyo at ilegal na video karera dito sa Brgy. 518 Zone 51 Sampaloc, Maynila. Amin pong hihintayin ang inyong mabilisang pag-aksyon. +639184033 – – – –

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com