Mag-ama todas sa trailer truck

HINDI na umabot nang buhay ang isang mag-ama makaraan sumalpok ang sinasakyan nilang motorsiklo sa isang trailer truck sa lungsod Quezon kahapon ng hapon.

Sa ulat ni Insp. Erlito Renegin, hepe ng Quezon City Police District Traffic Sector 1, kinilala ang mag-amang sina Edwin Aningalan, 58, at Albert, 32, kapwa residente ng Caloocan CIty.

Habang sumuko ang driver ng truck na si Romnick Alduesa, ng Mandaluyong city.

Nangyari ang insidente sa kanto ng Araneta Avenue kanto ng Quezon Avenue, Brgy. Sto. Domingo, dakong 3:30 pm.

Sakay ng kanilang motorsiklo ang mag-ama at binabagtas ang Araneta Avenue ngunit pagsapit sa kanto ng Quezon Avenue biglang dumating ang trailer truck na may kargang container van, na nagresulta sa pagsalpok dito ng sasakyan ng mag-ama.

Isinugod ang mga biktima sa EAMC ngunit hindi na umabot nang buhay.

Almar Danguilan