HATAW! D'yaryo ng Bayan hatawtabloid.com
DAGUPAN CITY – Patay ang isang 19-anyos binatilyo makaraan mahulog mula sa puno ng mangga nang tamaan ng kidlat sa bayan ng Manaoag, sa lalawigan ng Pangasinan kamakalawa.
Nagkaroon nang matinding pinsala sa katawan ang biktimang si Mario Pagaduan, residente sa Brgy. Pugaro sa nabanggit na lugar.
Napag-alaman, nagpaalam sa kanyang ama ang biktima upang manguha ng bunga ng mangga malapit sa kanilang bahay makaraan silang maghapunan habang kasagsagan nang malakas na ulan at pagkidlat.
Nabahala ang kanyang pamilya nang matagalan ang biktima sa pagbalik sa kanilang bahay kaya siya ay hinanap.
Laking gulat na lamang nila nang makitang nakahandusay ang biktima sa lupa sa silong ng puno ng mangga.
Nakitaan ng senyales ng pagkasunog ang katawan ng biktima na posibleng dulot ng kidlat.
