Sanggol patay sa saksak ng kaaway ni tatay

CEBU CITY – Patay ang isang sanggol na sinabing nadamay sa pananaksak ng kaaway ng ama habang siya ay karga, kamakalawa.

Kinilala ang sanggol na si Edbert Liao, anim-buwan gulang, habang ang ama ay si Ralph Randy Sevilla, 39, residente ng Sitio Fatima, Hi-way Tagunol, Brgy. Basak-Pardo, lungsod ng Cebu.

Ayon kay SPO2 Rommel Bancog ng Cebu City Police Office Homicide Section, karga ng ama ang kanyang anak nang biglang lumapit ang suspek na si Richard Fhidel Lariego II, 38, kapitbahay ng mga biktima.

Sinasabing dumating ang suspek dahil sa personal na dahilan ngunit nauwi ito sa hindi mainitang pagtatalo.

Inilabas ng suspek ang kutsilyo mula sa kanyang tagiliran at agad sinaksak si Sevilla.

Ayon kay SPO2 Bancog, habang nakikipagbuno ang ama ay nasaksak ng suspek ang sanggol na kalong ni Sevilla.

Nabatid na tinamaan din ng saksak ang ama sa leeg at braso habang ang sanggol ay sa dibdib.

Agad naitakbo sa ospital ang mga biktima ngunit ilang minuto lang ang lumipas ay binawian ng buhay ang nasabing sanggol.

Samantala, sa isinagawang hot pursuit operation ng Pardo Police Station agad naaresto ang suspek na nakatakda nang sampahan ng kaso.

Matandang alitan ang nakikitang motibo ng kapulisan sa nangyaring krimen.