Nawalan ng trabaho buntis naglason

UMINOM ng lason bunsod ng depresyon ang isang buntis makaraan masibak sa trabaho bilang kasambahay kamakalawa ng umaga sa Malabon City.

Hindi na umabot nang buhay sa Pagamutang Bayan ng Malabon ang biktimang si Rosalinda Cortan, 30, ng Gulayan, Brgy. Catmon ng nasabing lungsod.

Batay sa ulat ni Chief Insp. Rey Medina, hepe ng Station Investigation Division (SID) ng Malabon City Police, dakong 9 a.m. nang nang matuklasan ang pagpapakamatay ng ginang sa loob ng kanilang bahay.

Salaysay ng mister niyang si Roseto, 38, nadatnan niya ang kanyang misis na nakahandusay sa loob ng kanilang bahay kaya isinugod niya sa nasabing pagamutan ngunit idineklarang patay na ni Dr. Ronaldo Cantilang.

Sa imbestigasyon ni PO3 Alexander Dela Cruz, labis na depresyon ang dinaranas ng anim- buwan buntis na ginang makaraan mawalan ng trabaho bilang  part time na kasambahay.

Sinabi ni Roseto, lalong nalungkot ang biktima nang hindi siya pumayag na umuwi na sila sa Mindanao dahil mahirap ang buhay roon.

Rommel Sales