Misis tinarakan ni mister (Kalaguyo ang pinili)

LAOAG CITY – Inihahanda na ng Philippine National Police sa Bacarra, Ilocos Norte ang kasong isasampa laban sa isang mister na sumaksak sa kanyang misis makaraan matuklasang may kalaguyo ang ginang.

Kinilala ang biktimang si Sonia Hinayun, 50, habang ang suspek ay asawa niyang si Regalado Hinayun, 50, driver, kapwa residente ng Brgy. Cabulalaan sa nasabing bayan.

Sa imbestigasyon ng PNP Bacarra, nakahiga ang biktima sa kanilang silid nang biglang pumasok ang suspek at dalawang beses siyang sinaksak sa dibdib.

Mabilis na sumaklolo ang kanilang anak na si Roselyn at isinugod ang biktima sa Gov. Roque Ablan Sr. Memorial Hospital sa Lungsod ng Laoag, habang ang suspek ay agad tumakas ngunit nahuli rin ng mga pulis sa Brgy. Pasngal sa bayan ng Bacarra.

Sinasabing nagalit ang mister nang matuklasang may iba nang minamahal ang asawa at nang papiliin ang misis, pinili ang kanyang kalaguyo.