HATAW! D'yaryo ng Bayan hatawtabloid.com
DAGUPAN CITY – Masusing iniimbestigahan ng pulisya ang pagkamatay ng isang security guard sa Lungsod ng Urdaneta sa lalawigan ng Pangasinan, sinasabing nahulog mula sa ikalawang palapag ng gusaling kanyang binabantayan makaraan aksidenteng pumutok ang kanyang baril at siya ay tinamaan kamakalawa.
Palaisipan ang pagkamatay ng biktimang si Mar Llego, residente sa Dagupan City.
Sinasabing nag-iikot sa ikalawang palapag ng binabantayang gusali sa Brgy. Poblacion si Llego nang aksidenteng maiputok ang bitbit na baril kaya tumalbog ang bala at tumama sa kanyang ulo bago tuluyang nahulog.
Isinugod sa ospital ng mga kasamahan ang biktima ngunit binawian ng buhay habang nilalapatan ng lunas.
Iniimbestigahan ng pulisya ang kasamang guwardiya ng biktima upang mabatid kung may naganap na foul play sa pagkamatay ni Llego.
