HATAW! D'yaryo ng Bayan hatawtabloid.com
NATAGPUAN ng pulisya ang bangkay ng isang babaeng pinatay ng karelasyon sa Marilao, Bulacan.
Nahukay ng Scene of the Crime Operatives (SOCO) at mga lokal na opisyal ang labi ni Romaine Dalmacio na isinimento sa loob ng bahay ng suspek sa Estrella Subdivision, Brgy. Patubig.
Ito’y makaraan aminin ni Reynold Victoria ang krimen sa himpilan ng pulisya dahil sa pagbagabag ng konsensiya.
Kuwento ni Victoria, Abril 27, 2011 nang sumugod si Dalmacio sa bahay niya at ng kanyang asawa habang armado ng baril.
Napatakbo aniya ang kanyang mag-iina habang nagpambuno sila ni Dalmacio. Ngunit sa pagdepensa aniya sa sarili ay napukpok niya ng martilyo sa ulo si Dalmacio na agad niyang ikinamatay.
Sa takot ni Victoria ay isinimento na lamang niya ang bangkay ng karelasyon sa kanilang kusina at naitago ito sa loob ng apat na taon.
Kasama rin sa nakuha ng mga awtoridad mula sa crime scene ang mga ginamit ng suspek sa krimen.
“Sa loob po ng apat na taon ay palagi ko siyang napapanaginipan, kinokonsensiya po niya ako sa ginawa kong pagpatay sa kanya. Hindi na po ako makatagal kaya sumuko na ako,” pahayag ni Victoria.
Sasampahan ng kasong murder si Victoria.
Daisy Medina
