3 tulak huling nagre-repack ng shabu

LAOAG CITY – Naging positibo ang operasyong ng mga kasapi ng Philippine National Police sa Lungsod ng Laoag laban sa tatlong hinihinalang tulak ng ilegal na droga.

Naaktohan ng mga awtoridad ang mga suspek na sina Mark Bryan Jacinto alyas Pagi, 32; Andres Medrano alyas Chavit, 32; Wilbert Aquino alyas Gilbert, 32, pawang ng Laoag City, habang nagre-repack ng shabu sa bahay ng isa sa mga suspek.

Sa naturang operasyon ay nakuha mula kay Jacinto ang tatlong malalaking sachet ng hinihinalang shabu at isa pang sachet ng  shabu ang nakuha kay Medrano at dalawa kay Aquino.

Ayon kay S/Supt. Jeffrey Gorospe, chief of police ng PNP Laoag, si Aquino ay pangpito sa top 10 drug personalities sa Lungsod ng Laoag at matagal na nilang minamanmanan ang ilegal na aktibidad.

Naniniwala ang opisyal na kararating lamang ng suplay na droga ng mga suspek kaya’t nadatnan sila ng mga pulis na nagre-repak sa bahay ni Aquino.