UMak College of Nursing building overpriced din ng P579.4-M?!

MUKHANG malapit nang tanghalin na ‘hari ng overpriced’ si Vice President Jejomar Binay.

Heto na naman, nabunyag na naman sa Senate Blue Ribbon Committee ang isa pang proyektong grabe ang overpricing.

‘Yan po ‘yung gusali ng University of Makati – College of Nursing (UMak).

Batay umano sa kuwentada ni Atty. Renato Bondal, hindi kukulangin sa P579.5 milyones ang overpriced sa nasabing  gusali.

Ang apat na palapag sa 12-storey College of Nursing building ay pawang parking area habang silid at auditorium naman ang iba pa.

Naniniwala si Bondal na hindi dapat pareho ang pagkuwenta para sa parking area, roof deck at silid-aralan. 

Sa unang hearing nitong nagdaang linggo, sinabing aabot sa P1.2 bilyon ang halaga ng gusali.

Pero as usual, hindi na naman daw dumaan sa tamang proseso ang proyekto at tulad ng Makati City Hall building II, “bidding-bidding-an” ang nangyari sa kontrata nito.

S’yempre ang paboritong Hilmarc’s Construction din ang pinaborang kontratista sa naturang gusali.

Hindi lang umano sa building, patuloy din umano ang pagkita ni Binay sa College of Nursing sa pamamagitan ng tax dividend mula sa Philippine Healthcare Educators, Inc. (PHEI) na itinalagang mag-manage at maningil ng tuition sa kolehiyo. 

 Nanunungkulang chairman ng Philippine Health Educators Inc., ang isang Dr. Jack Arroyo, na sinasabing dummy ni Binay.

Ang PHEI ang namamahala sa kursong nursing ng UMak.

Bukod pa ito sa Joint Agreement ng University of Makati at STI para sa paglulunsad ng College of Nursing.

Wala rin umanong public bidding sa pagpili ng UMAK sa STI kundi direkta lamang itong pinili.

At kahit walang inaprubahan at iginawad na awtorisasyon ang Makati Council sa UMAK, lumagda ito sa Memorandum of Agreement sa STI para ibigay sa Philippine Health Educators Incorporated o PHEI, ang pamamahala sa Colege of Nursing sa UMAK.

Ang sharing umano ng kita sa College of Nursing, ay 40 percent ang napupunta sa UMak, 40 percent sa STI at 20 Percent ang napupunta sa PHEI ni Dr. Arroyo.

Tsk tsk tsk…

Sa dami ng naglulutangang OVERPRICED issue, dapat pa kayang magtiwala ang sambayanan sa mga Binay?!

Bayan, kayo na po ang bahalang humatol.

“Express” Lifting Blacklist Order (Attention: SOJ Leila de Lima)

NITONG nakaraang Lunes, isang Chinese national na nagngangalang WONG IEK MAN ang hinarang sa Customs Cebu inspection area sa MCIA matapos makita sa X-ray ang ilang plastic ng powdered substance sa kanyang dala-dalang mga bagahe.

Napag-alaman na si WONG IEK MAN ay inilagay sa Blacklist Order ng BI nito lang January 14 (2015) sa kasong paglalabas-pasok sa Pilipinas bitbit ang maraming Chinese nationals pero kapag lumabas naman ng bansa ay hindi na niya kasama.

So, may posibilidad na human trafficker ang nasabing tsekwa.

Sa Blacklist Order na inilabas ng BI Legal Division, may provision na dapat tumagal nang isang taon bago mag-apply ng lifting si WONG IEK MAN.

Pero laking gulat ng BI-MCIA Immigration officers nang ipresenta ni WONG IEK MAN ang dala niyang

Lifting Order na nagsasaad na wala na siya sa Blacklist Order simula nitong April 24 (2015).

What the fact!?

Ibig sabihin tatlong (3) buwan lang tumagal ang kaso nitong si WONG IEK MAN ay pinera ‘este pinayagan na agad ng BI-OCOM na ipa-lift ang blacklist laban sa kanya!?

Considering na suspected human trafficker ang nasabing tsekwa, hindi dapat agad pinayagan ng bright boys sa BI-OCOM na muling maglabas-pasok ng bansa bitbit ang sandamakmak na tsekwa galing sa mainland China!

Paano pa kung ang powder substance na nahuli kay WONG ay nag-positive na illegal drugs!? Paano kung ang mga kasama niya ay involve pala sa sindikato ng droga, e ‘di lalong naging happy ‘yang tsekwa na ‘yan?!

Sino ba talaga ang nagkapera ‘este dapat tanungin sa pagkaka-lift ng kaso ni Wong? Ang Legal ba, BSI, o mismong ang OCOM???

Na-violate ba ‘yung provision sa Immigration Administration Circular No. SBM-2014-001 paragraph D!?

Ang dami pang pa-ek-ek ng lifting order ni WONG, kesyo humanitarian, economic, poltical reason pa raw kaya dapat i-lift ang BLO n’ya?!

Kung mismong OCOM ang nag-violate sa provision of one (1) year bago ma-lift ang kaso nitong si WONG IEK MAN, hindi kaya napalusutan si Mison ng mga tao niya sa OCOM?

Ano sa palagay mo, Atty. Pizza ‘este Plaza??

Pero knowing, kung gaano kagulang ‘este katalas itong si Freddie Boy Mison, mukhang imposible na mapalusutan nang gano’n-gano’n na lang ‘di ba?

Sa mga ganitong pangyayari, talagang maliwanag na may palakasan diyan sa Bureau kahit na mabigat pa ang kaso ng involved na foreigner.

Hindi kaya mas mabuti pa kung iutos na lang ni Sec. Leila De Lima na sa DOJ na lang i-process ang mga lifting ng Blacklist para siguradong walang areglohan at by the merits na lang ang magiging basis ng lifting of blacklist?

Maiiwasan din na makapag-penetrate o makapagdikta sa OCOM ang ilang malalakas na law offices o lawyers lalo na at kadikit ng ilang lawyers diyan!?

Lumalabas tuloy, “the one who makes the rules, break the rules” ba?

SOJ Leila De Lima, marami na tayong na-ririnig na talamak ang bentahan ng lifting ng blacklist order diyan sa BI.

Dapat na sigurong magbuo ng investigating panel para imbestigahan ‘yang ‘lifting-for-a-fee’ na nangyayari ngayon diyan!?

 

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com