‘Snatcher’ sugatan nang mabundol ng biktima

SUGATAN ang isang hinihinalang snatcher makaraan mabundol ng kanyang biktima sa kanto ng E. Rodriguez at Tomas Morato sa Quezon City kamakalawa.

Kuwento ni Delia Leung, lulan siya ng kanilang sasakyan nang hablutin ng naka-motorsiklong suspek na si alyas Ben ang kanyang mamahaling bag na may lamang pera at mga alahas. 

Batay sa paunang imbestigasyon, hindi pa nakalalayo si Ben nang maipit sa trapik at mawalan ng kontrol sa motorsiklo.

Nagkataong paparating ang sasakyan ng humabol na biktima at nasagi ang papatakas na suspek. Dahil dito, pumailalim sa sasakyan si Ben at nasakote ng mga nakapaligid na tao.

Giit ni Joseph Leung, asawa ng biktima, “Hindi ko naman s’ya gustong sagasaan e. Gusto ko lang makuha ‘yung bag, e tumama s’ya.”

Itinanggi ni Ben ang paratang sabay giit na, “Tumulong lang ako. Ako ‘yung humabol sa snatcher, ako pa ‘yung binangga nila.”

Patuloy ang imbestigasyon ng pulisya sa insidente.